किशन प्रणय की ‘अंतरदस’ काव्य संग्रह का विमोचन

अस्या ई भावाँ को सारथी कवि किशन ‘प्रणय’ की पोथी ‘अंतरदस ‘ काव्य की असी पोथी छै ज्यो सामाजिक संवेदना अर संस्कृति का कतना ई आयाम अर कैई पहलू असल रूप में तो धरै ई छै साथ ई मन के भीतर चालती द्वन्द्व की धारा ईं बी एक दिसा दै छै। जदी तो कवि की आध्यत्मिक  संचेतना भौतिक जगत् का व्यवहारिक रूप ईं उजागर क’र मनख की वैचारिक कड़ियाँ ईं तो जोड़ै ई छै साथ ई ऊँ की प्रवृत्ति का छिप्या भावाँ ईं बी उभारै छै।

  ‘तरपति’ की चार लाइणा सूँ लैर ‘आंटै-सांटै ‘ की तिरेपन लाइणा तांईं विस्तार पाता ‘विचार’ जद ‘तरक्की ‘ करै छै तो ‘लोकतंतर’ में रमै छै, ‘रचना’ में उभरै छै, ‘दुविधा’ में रै’र ‘औकात’ पै आ जावै छै ‘फैर’ ‘ठाम’ पै पूग’र ‘सोच’ में डूब जावै छै अर ‘परख’ करबा लागै छै ‘किताबां’ की अर हो जावै छै ‘समालोचक’ अर ‘भरम’ सूँ ‘प्रेम’ ईं निकाल’र ‘आस’ बंधावै छै। ईं कै बाद धीरां-धीरां ‘इगसा’ का बादळ हटावै छै अर आपणा ‘अंतस’ में दबी ‘हूंस’ ईं ‘बिसवास’ कै साथ ‘व्हाँ’ लै जावै छै ‘ज्हाँ तांईं’ ‘पिरथवी’ का हरैक ‘खुण्या’ पै ‘संसकार’ डालबा को ‘बारीक काम’ होवै छै। य्हाँ सूँ ई ‘हाँको’ पड़ै छै अर  ‘उघाड़ो’ मनख आपणी ‘पिछाण’ ईं छिपा’र ‘अबखो गेलो’ ऊंघाल’र आपणी ‘मायड़ भासा’ में ‘बात’ करता थंका ‘चक्कर’ लगातो जावै छै। ‘सगपण कै समरपण’ का भावाँ में जकड्या ऊँ का ‘खाली हाथ’ सूँ  ‘छूटती कलम’ आपणी ‘तासीर’ को ‘असर’ दिखाती पाछी ‘माटी’ सूँ जुड़ै छै तो आपणा ‘सत’ ईं रखाण ‘सबद’ की जातरा में ‘एक दस’ सूँ ‘बोध’ लै’र ‘आतमा’ आड़ी चाल पड़ै छै हेरेबा ‘अंतरदस’… ‘मुगती’ कै लेखै… बिना ‘चूक’ करयाँ…।

आखीर में या ई कै उपन्यासकार- कवि किशन ‘प्रणय’  की ‘अंतरदस ‘ की कवितावाँ दार्शनिक भावाँ कै साथ सामाजिक यथार्थ ईं सामै लाती असी कवितावाँ छै ज्यो मनख जीवन की संवेदना अर ऊँ का बदळता विचारां की परिवेदना ईं आस अर विस्वास कै बीच जातरा करावै छै। असी जातरा जीं में मनख कै भीतर की अंतरदसा ऊँ कै बाहरै की दसों दिसावाँ का उजास में मिलती जावै छै अर ऊ आगै ई आगै बढ़तो जावै छै। आगै बढ़बा की दिसा देती याँ संदी कवितावाँ में मनख अर ऊँ का विचारां में असी जुगलबन्दी होवै छै कै ऊँ का सुर आखो मलख सुणबा कै लेखै एक-दूजा मनख ईं हेरतो दिखै छै। मनख में मनखपण ईं हेरबा की दिसा में या “अंतरदसा” एक दिसा देती पोथी छै।